 |
| شايف كيف؟ واضحة القصة |
ربيع: خيي سميح كيفك اليوم؟
سميح: أهلااان أبو الربع! والله نص ع نص... ومتل ما بقول زياد نص الألف خمسمية...
ربيع: له! ليش خير انشالله؟ عم تشكي من شي إشبك شي
سميح: هلأ للصراحة ما إشبني شي بس عم بشي من كل شي. يعني كأنك مش عارف... متل ما بقول زياد "ولك شيل هالصهريج من هون" عرفت كيف خيي، بس بدك مين يفهم التلميح وإنت استاذنا
ربيع: ما علينا، خيي أبو السماحة أنا آصد الله وآصدك بخدمي... إنو...
سميح: عمهلك عمهلك شوي... على رأي زياد تخبز بالأفراح صديقي...مبلشلي فيها سماحة وآصد الله يعني حاسس حالي عند المفتي قباني خيي. أنا كعلماني ما بهضم هلأسلوب بالحكي. وعلى رأي زياد خلص عصبت خيي... عصبت...
ربيع: له يا أبو السمح ما لازم اتعصب أنا بس...
سميح: هلق عملتلي ياها فيلم أميركي طويل، بعرف مش لازم عصب بس عصبت خلص! يسلملي ربك يا زياد... درر...درر!!
ربيع: بعتذر خيي سميح. بس إنو في مجال تجاوبني على سؤال، خدمنا ياها خدمي بس
سميح: سأل خيي ربيع وعلى رأي زياد "شو بتعوز شي في شي...بحسك بتشيل تقلي مرات"
ربيع: خيي سميح.. ما تفهمها غلط يعني بس انت شيعي شي؟ يعني إنو شو دينك إذا في مجال طبعاً...
سميح: ولا واحد متلك شو دينك! ولا ولا...ولا شو خصك بديني!
ربيع: خيي سميح فهمتني غلط با...
سميح: ولا أنا علماني ولا! سألني شو بشتغل، شو باكل، شو وزن خزانتي، على راسي! بس شو ديني؟ على رأي زياد "يا بلا فهم!"
ربيع: يا سميح المو..
سميح: ولا خيي بدكن تضلو تتر؟
ربيع: يا زلمي صر..
سميح: ولا بدكن تضلو بقر؟!!
ربيع: نح..
سميح: بلا نح بلا بح نشالله بتنبح! يقطع عمرك أنا علماني! شو ما بتفهم؟
ربيع: بد...
سميح: دينك بينك وبين ربك يلعن...
ناجي: ولك شو القصة صوتكن بضل طالع متل سعر البنزين؟
سميح: أنا علماني، وبكل وقاحة صاحبك ربيع الخريف بيسألني ش..
ربيع: عم تسأل يا ناجي؟ قلتلك بلا ما نسألو هالسؤال! دفق متل شلالات الصرف الصحي بوادي الضيعة!
ناجي: ولك ماشي خل..
ربيع: وأنا ماشي كمان حللو عني يا!
سميح: شوف كيف بينبر كمان متل يللي معو حق. نقبر الله لا يجيبك!
ناجي: له يا سميح ولو هيدا صاحبنا!
سميح: يللي بهين علمانيتي مش صاحبي! فهمت!
ناجي: أنا فهمان بس إنت فهمت الموضوع غلط!
سميح: غلط أو صح، ما بسمح كعلماني إنو حداً يسألني عن ديني!
ناجي: المو...
سميح: كنت مفكرو غير هيك! طلع متلو متلووون... طائفي منغلق متعفن.... محتكر...قذر....
ناجي: بدك تسمع واللا بليحك؟!!!
سميح: لأ لأ بسمع... نحن كعلمانيين لا نؤمن بالعنف... إلى أن نتولى السلطة...بعدها على رأي زياد...سعيدي يابا ودعوس....درر يا زياد...درر!!!!
ناجي: يا عمي إذا إنت علماني، ربيع ملحد! ولك راح مخك لبعيد يا زلمي....
سميح: ملحد ما بيسأل عن ديني! بيعرفني علماني، شو عم بزرركلي! أنا بد...
ناجي: رح ليحك!!
سميح: خلص خلص عمبسمعك صديقي...
ناجي: ولا حاج تنعي! شو باك حامل الربابة وعم تنعي! مش هيك كمان قال زياد؟
سميح: درر زياد والله درر!!! بس يا خيي هيدا ربيع نكرزني ولك إحترم علمانيتي بس!
ناجي: القصة وما فيها إنو ربيع خطب بنت من النبطية، مسائب عيد ميلادها السني بعاشورا. بتعرف فترة حداد عند الشيعة. وربيع كملحد ما بيفهم بهالشغلات وطبعاً بدو يزورها ببيت أهلها. بدو يسأل حداً شيعي إذا مناسب ياخد معو هدية وكيك على شوكولا. بتعرف هاي المسائل حساسة شوي...
سميح: اغمنمهم... هاي هيه؟
ناجي: هياهه...
0 comments:
Post a Comment