الحاضر والآت، في ميليشيات زين الأتات

* باللهجة اللبنانية 

من أكثر من خمسين سنة، إنهوس العالم العربي بتحرير فلسطين. وهي قضية عادلة دون أدنى شك! ولكن الإبتزاز وصل إلى مرحلة اننا لم نعد نكترث لأي أمر آخر! كلما طلب المواطن من المسؤول ربطة خبز ليطعمي لولاد بيجي الجواب:"العمى بقلبك ما أوقحك! هلق وقتك؟ نطرلك يومين منحرر فلسطين ومنرجعلك!". 

طبعاً مرت سنتين وعشرين وستين ولا تحررت فلسطين ولا أكلو لولاد! يمكن لو أكلو وقتا كانو شدو حيلون أكتر وحرروها! بس شو بدك تحكي... أنظمة إجرستراتجيه!

في لبنان سمالله سمالله ما أحلانا والله، بعدنا عم نعزف على نفس النغمي بس طبعاً طبعاً منجلجئة بترطوشة خرطوشة الإبداع اللبناني! بتقلو بنزين بجاوبك:"ولك خلينا نشوف المحكمي أولاً، هلق بطلت تعيش بلا الزد إكس يا نوري!". بتقلو جوع بجاوبك:"عاشو محروقة بصلتك؟ جوع شوي، الصيام من الإيمان! خلينا مركزين على الخطر الإمبريالي الصهيوني الإستعماري الاستكباري التتاري وبعدين منطعميك!" 

وكأن فرقة يفتح الله كان ناقصها كمنجة ليزيد في الطنبور نغمٌ! في كورال جديد دخل عالخط، بتقلو بيئة، حوادث سير، عمالة أطفال وكل القيل والقال ولا هوي هون. الجواب واحد:"بدي سقط النظام! بعدين بفضالك!"

أهلين...

يللي ما بيقدر ينجز تفصيل، حاج يضرب عالتقيل! (يسلم تمي لما بدلق درر!)

يعني مثلاً، من أسبوع كان في فضيحة على برنامج كلام الناس مع مارسيل غانم (LBC). بالمختصر،  مستحضرات فيها مواد مسرطنة تباع للناس كأعشاب طبية. وطبعاً كان نجم الحلقة الحاضر في غيابه، إبن سينا القرن الواحد والعشرين، مستخلص النعنع من مخالب التنين، قاهر البحار والجبال وجواب كل سؤال، ذا تشوزن ون، ملك النبات زين الأتات!

بما إنو في القانون اللبناني المتهم بريء حتى تسقط واسطته، أطالب زين الأتات بمحاكمة كل من ظهر في حلقة كلام الناس المذكورة إذا كانت الإتهامات التي طاولته باطلة. أما إذا كانت صحيحة، فاسمحو لي أن أفتح المزراب عالآخر...

حسب تقارير دولية -نسبةً إلى طبيب في الجامعة الأمريكية في بيروت- ٤٨٪ من المصابين بسرطان الثدي بين النساء في لبنان هم دون ٤٥ عام في حين أن المعدل العالمي هو ٢٥٪  

من السذاجة إعتبار أن زين الأتات ومستحضراته تسببت في هذا الإرتفاع. ولكن قضية زوزو ومستحضراته تلقي الضوء على طبيعة ما  نأكل ونشرب. سرطوني صغيري من عند زوزو على سرطوني بشي مستحضر Make up على سرطوني بكل زيتوني، سرطوني على سرطوني بتعمل سرطان! واضحة! صبايا وسيدات لبنان بزهرة عمرن عمينحقنو سرطان! اليوم ، امبارح، وبكرة! مين -ولا مؤاخذي- هز *يزو وفز يحمي إختو وإمو وحبيبتو وكل وردات لبنان؟!

أقصى ما وصل إليه الوزير والنائب في حلقة مارسيل إنو "خلص بطلنا نسمحلو!" صح النوم! قال "من اليوم -هاي من جمعة- الأمن العام أزال كل الإعلانات عن الطرقات!" بحياة الله؟ ومين هوي هالشب الشتلي لحامل شتلي ومعربش على لعواميد عالطرقات؟ يه! ولك هيدا زوزو! وهل يخفى القمر؟


وهاي Amana care كمان شغالي. النائب المحترم قال في الحلقة:"زين الأتات خبر زميل إنو شو ما عملتو ما راح يطلع من أمركن شي" يعطيك العافيه...


من قال المرجلي إنو يسكر مستودع زوزو؟ المطلوب إنو ينزت زوزو الوحش بقفص محطوط بزاوية حبس ما بتشوفو الشمس ولا بتنبت فيه شتله -حتى ما يعطي شي وصفي فتاكه للمساجين. المطلوب إنو نشرح لكل  شخص إشترى من هالمستحضرات أن له الحق بالتعويض المادي والمعنوي. المطلوب محاكمة كل من خطت ودبر وساهم ونفذ وغطى وتستر على هذه الجريمة.


مش شغلة كل مواطن يعمل مختبر بحمام بيتو ليفحص شو عم ياكل، ولا يبعت تحري على جامعة تنزانيا تيشوف إذا الحكيم لعمبعالجو عنجد ماخد شهادتو من هونيك واللا راسمها على ايدو رسم. من شان هيك الناس وظفت مسؤولين بدول وعم تدفعلن معاشات من دم قلبا!فشل سياسي فهمنا، غباء إقتصادي صبرنا، بس توصل إنو تسرطنونا مع سابق الإصرار والترصد وبس تطلع الريحة تلموها وتربحونا جميلي، متل لطواويس تتنطحو عالتلفزيونات، هاي كبيري!


يلي مش قادر على زوزو يسد بوزو وحاج يعمل زلمي عالهبل! أي موظف دوله فاشل بينزعب على بيتو من صغار موظفي الإدارات إلى أعلى الرئاسات!


بهيدا الموضوع اللبنانيه صوت واحد وإيد وحدي. بدن يعرفو شو صار وبدن يحاسبو ومش راح يسكتو على سرطنتن! مش هيك؟


ولك بس مين فاضي هلق؟


خلينا بالأول نبصم لبلمار بالعشرين!
خلينا بالأول نحرر شبعا وليبيا وفلسطين!
خلينا بالأول نسقط النظام وندفن هالتلات ملايين طائفي تحت الطين!
وبعدين إذا ضلينا طيبين منحاول نحمي شي بنتين باقيين!